ა(ა)იპ პროფესიული უნარების სააგენტოს მიერ დაფინანსებული პროექტის – „თვითმმართველობა – სტუდენტთა წარმომადგენლობითი ორგანო“ – ფარგლებში, 2025 წლის 28 თებერვალს კოლეჯ „ოპიზარში“ სტუდენტური თვითმმართველობის არჩევნები გაიმართა. აღნიშნული პროცესი მნიშვნელოვანი ეტაპი იყო კოლეჯის სტუდენტური საზოგადოების განვითარებისთვის, რადგან არჩევნებმა შესაძლებლობა მისცა სტუდენტებს, პედაგოგებსა და ადმინისტრაციულ პერსონალს, ერთად აერჩიათ ის ლიდერები, რომლებიც მათი ინტერესების დაცვასა და სტუდენტური გარემოს გაუმჯობესებას უზრუნველყოფენ.
არჩევნების პროცესი ორი ეტაპისგან შედგებოდა: პირველ ეტაპზე კანდიდატებმა წარადგინეს საკუთარი საარჩევნო პროგრამები. თითოეულ მათგანს მიეცა 15 წუთი საკუთარი ხედვისა და იდეების გასაზიარებლად და რის შემდეგაც 5 წუთი დაეთმო კითხვა-პასუხს.
მეორე ეტაპზე ჩატარდა ფარული კენჭისყრა, სადაც სტუდენტებმა და კოლეჯის თანამშრომლებმა გააკეთეს ინფორმირებული არჩევანი. გამარჯვებული კანდიდატები დაბალანსებული, მაგრამ საკმარისი უპირატესობით გამოვლინდნენ. მიუხედავად იმისა, რომ რეგლამენტი ითვალისწინებდა პოტენციურ განმეორებით კენჭისყრას თანაბარი ხმების შემთხვევაში, ეს საჭირო არ გამხდარა.
არჩევნების შედეგების მიხედვით, სტუდენტური თვითმმართველობის ახალი გუნდი ასე დაკომპლექტდა:
- პრეზიდენტი: ზურა ღვინიაშვილი (სატყეო საქმის ინტეგრირებული პროგრამის სტუდენტი)
- ვიცე-პრეზიდენტები: ცოტნე ბალახაშვილი (კულინარიის ხელოვნების პროგრამის სტუდენტი) და თამთა ჩხიტუნიძე (ფრჩხილის მომსახურების პროგრამის სტუდენტი)
აღსანიშნავია, რომ არჩევნები კოლეჯში ღია და ინკლუზიურ გარემოში ჩატარდა. ყველა კანდიდატს თანაბარი შესაძლებლობა მიეცა საკუთარი ხედვის წარსადგენად, ხოლო სტუდენტებსა და კოლეჯის თანამშრომლებს – ინფორმირებული არჩევანის გასაკეთებლად. პროცესი გამჭვირვალე და სამართლიანი იყო, რაც კიდევ უფრო განამტკიცებს სტუდენტური თვითმმართველობის მნიშვნელობას კოლეჯის ცხოვრებაში.
სტუდენტური თვითმმართველობა წარმოადგენს სტუდენტთა წარმომადგენლობით ორგანოს, რომლის მიზანია კოლეჯის სტუდენტური გარემოს გაუმჯობესება, ინიციატივების მხარდაჭერა და სტუდენტების ინტერესების დაცვა. ახალარჩეული გუნდი მომდევნო ერთი წლის განმავლობაში იმუშავებს სხვადასხვა აქტივობებისა და ინიციატივების განხორციელებაზე, რაც ხელს შეუწყობს სტუდენტური ცხოვრების გააქტიურებას, სწავლების ხარისხის გაუმჯობესებას და სტუდენტთა ჩართულობის ზრდას.
